Kanali 7...

Basha: Qindra qytetarëve nuk u bëhet tampon në shtet, sistemi shëndetësor, i braktisur

Lideri i PD, Lulzim Basha denoncoi se shumë qytetarë nuk e kryejnë dot tamponin për koronavirusin në shtet. Sipas tij, ata detyrohen të blejnë vetë paketat e trajtimit anti-COVID sepse nuk marrin dot shërbimin e duhur. Lulzim Basha tha gjatë konferencës me gazetarët se sistemi shëndetësor është sot në ditën më të keqe.

 

“Jo vetëm 257 të shtruarit e sotëm, por edhe qindra të tjerë që nuk u bëhet tamponi në shtet, blejnë privatisht paketën e trajtimit anti-COVID. Sistemi shëndetësor është i papërkrahur, i pambështetur, i braktisur. Spitalet janë kthyer në qendra të shpërndarjes së infeksionit. Duhet të sigurohen pajisjet mbrojtëse për të gjithë mjekët e infermierët. Spitalet COVID kanë ezauruar kapacitetet e shtrimit.”

 

Basha përsëriti pikat e planit të propozuar nga PD për rimëkëmbjen ekonomike. Ai tha se duhet të garantohet mbrojtje për mësuesit, të anulohen shpenzimet e luksit qeveritar, të ndihmohet biznesi i vogël, të dyfishohet ndihma ekonomike dhe të ndihmohen pensionistët.