“Bëhu një herë njerëzor”/ Çupi, Ramës: Shko te gratë naftëtare, paguaji e ik!

Pas thirrjeve të kryeministrit Edi Rama për naftëtarët që të dalin nga greva, reagoi ish-deputetja demokrate, Dhurata Çupi.

Ajo i kërkoi Ramës që të shkojë në Ballsh për t’u dhënë pagat grave naftëtare, t’u kërkojë ndjesë e më pas të largohet.

Çupi i kujtoi kryeministrit në “Facebook” se naftëtarët erdhën një herë në Tiranë për të dialoguer, por askush nuk i priti.

“Zoti kryeministër në ikje, në një familje të vërtetë,  gratë nuk lihen pa bukën e fëmijëve. Zonjat e nderuara, nga të cilat ti kërkon që të dalin nga greva, ishin në Tiranë, por nuk denjove as t’i presësh, as t’i dëgjosh. Këto gra gjithë halle erdhën për dialog nga Ballshi në Tiranë dhe ti u përplase derën në fytyrë! Të paktën, bëhu një here njerezor dhe jepu atë që u takon! Është cinike, e pashpirt, barbare sfida që ti zoti kryeministër u bën atyre grave të mbytura në halle nga parajsa e luksit ku jeton. Shko tek ato gra, kërkoju ndjesë, paguaji dhe pastaj ik!”

Gratë naftëtare janë futur në ditën e nëntë të grevës së urisë dhe gjendja e tyre shëndetësore sa vjen e përkeqësohet.