Kujdes! Nëse abuzoni me energjinë, jo vetëm burg, por do të paguani edhe dëmin

Nëse abuzoni me energjinë elektrike, nuk do të mjaftoheni vetëm me procedimin penal nga kompania, por do të paguani edhe dëmin financiar.

Vendimi i entit rregullator të energjisë elektrike parashikon edhe dëmin financiar për çdo konsumator që konstatohet duke ndërhyrë në sistemin e matjes.

Drejtori i Faturimit dhe Matjes në OSHEE, Ermal Murati tha në emisionin “E-zonë” në Vizion Plus se janë rreth 700 individë që janë konstatuar duke vjedhur energjinë elektrike, të cilët kanë shkaktuar një dëm prej 110 milionë lekësh në total.

“Në dhjetor të vitit të kaluar, enti rregullator doli me një vendim: kur dikush abuzon me energjinë elektrike, i nënshtrohet procedurave ligjore; nga krahu tjetër parashikohet edhe dëmi financiar, që është dëmi i shkaktuar në kurriz të kompanisë. Çdo konsumator që konstatohet duke ndërhyrë dhe abuzuar në sistemin e matjes, është i detyruar që të faturohet dhe të paguajë këtë energji. Si faturohet një konsumator? Pas verifikimit, kur kemi ndërhyrje në sistemin e matjes, nëse dikush tenton të abuzojë me këtë energji, OSHEE, pasi ka proceduar penalisht konsumatorin, nga krahu tjetër është i detyruar që këtë dëm të shkaktuar financiar, duhet ta faturojë. Është faturë e emëtuar nga Operatori i Sistemit të Shpërndarjes. Jemi duke vazhduar me kontrolle të vazhdueshme në terren. Janë rreth 700 konsumatorë që janë konstatuar se kanë abuzuar energjinë elektrike dhe iu është faturuar dëmi ekonomik.”