Ministrja gjermane: Ukraina ka nevojë për ndihmë ushtarake shtesë

Ministrja e Jashtme e Gjermanisë, Annalena Baerbock, premtoi mbështetje të mëtejshme ushtarake për Ukrainën, pavarësisht paralajmërimeve të fuqishme nga Rusia.

“Ukraina ka nevojë për mbështetje masive ushtarake”, tha Baerbock në një konferencë të përbashkët për media me homologun e tij polak Zbigniew Rau, pas takimit të tyre në Berlin.

Ajo tha se Grupi i Kontaktit i Ukrainës i udhëhequr nga SHBA, i cili përfshin Gjermaninë, Poloninë dhe aleatët kryesorë të NATO-s, diskutoi detajet e pakove të reja të ndihmës ushtarake për të ndihmuar Ukrainën të mbrohet kundër Rusisë.

“Ne po punojmë së bashku me Poloninë dhe partnerë të tjerë për të përforcuar dërgimin e armëve, municioneve dhe pajisjeve të rënda ushtarake në Ukrainë”, tha Baerbock.

Kryediplomatja gjermane nënvizoi gjithashtu se vendet anëtare të BE-së do të ndërmarrin masa të tjera ekonomike në ditët në vijim për të rritur presionin ndaj Kremlinit.

“Kam besim se si vende anëtare të BE-së do të arrijmë së shpejti një marrëveshje për pakon e 6-të të sanksioneve kundër Rusisë”, tha ajo, duke iu referuar sanksioneve shtesë që përfshijnë një embargo të naftës kundër Rusisë, diçka që Hungaria e ka kundërshtuar. Për paketën e re nevojitet unanimiteti i të 27 vendeve anëtare.

Rusia ka paralajmëruar vazhdimisht se dërgesat e armëve në Ukrainë do të “provokonin destabilitet” dhe do të bëheshin kërcënim për sigurinë e Evropës.

Të paktën 3 930 civilë janë vrarë dhe 4 532 janë plagosur që kur Rusia filloi një luftë kundër Ukrainës më 24 shkurt.

Sipas agjencisë së OKB-së për refugjatët, pothuajse 6,6 milionë njerëz kanë ikur në vende të tjera, ndërsa më shumë se 7,7 milionë janë zhvendosur brenda vendit.