Poliçan/ Infektohet drejtori dhe 2 punonjëse të Qendrës Polivaliente të të moshuarve

Covid-19 ka hyrë tashmë edhe në qytetin e Poliçanit, ku që prej muajit korrik nuk ka pasur asnjë të infektuar. Drejtori dhe dy punonjëse të qendrën polivaliente të të moshuarve kanë rezultuar sot “pozitiv” me SarsCov-2. Kjo ka vënë në alarm giithë stafin e kësaj qendre dhe të moshuarit,të cilët janë karantinuar dhe do i nënshtrohen tamponit.

Mësohet se të infektuarit janë pjesëtarë të së njëjtës familje dhe gjendja e tyre shëndetësore është e mirë. Edhe 5 raste të tjera në qytetin e Poliçanit,nga mosha 52-84 vjeç, janë konfirmuar “pozitiv” nëpërmjet skanerit të kryer pas shfaqjes së shenjave të theksuara të infektimit. Ata janë transportuar në Repartin e Karantinës në Spitalin Rajonal të Beratit, ku pëveç mjekimeve po marrim edhe trajtim oksigjenik.

Burimet zyrtare pranë DSHP-së Berat bëjnë me dije se,për të gjitha rastet e evidentuara “pozitive” po kryhet hetimi epidemiologjik i rasteve të kontaktit, ndërkohë që në qendrën e të moshuarve, ku edhe u shfaqën infektimet e para, është kryer dezinfektimi i të gjitha ambjenteve të brendshme e të jashtme. Aktualisht në të gjithë qarkun e Beratit numërohen 214 raste aktive me Covid-19.