Të riatdhesuarit nga Siria shfaqin shenja frike, do të qëndrojnë tek Kavalishenca në Durrës

4 fëmijët dhe gruaja Floresha Rasha që dje u riatdhesuan nga kampi Al-Hol po i nënshtrohen procesit të rehabilitimit dhe integrimit në shoqëri

Burimet bëjnë me dije se është ngritur një grup pune i oërbërë nga disa institucione, si Ministria e Shëndetësisë, Ministria e Arsimit, Ministria e Brendshme dhe Agjencia Kundër Ekstremizmit të Dhunshëm, të cilët kanë hartuar planin e punës për mënyrën se si do të vijojë trajtimi i 5 shqiptarëve të riatdhesuar.

Mësohet se plani i punës do të jetë afatgjatë. Aktualisht secilit prej tyre i është vendosur në dispozicion nga një mjek, infermier, psikolog, si dhe një ekspert arsimi.

Burimet shtojnë se gjendja e tyre shëndetësore paraqitet e mirë, por më problematike kanë anën psikologjike. Kjo pasi të riatdhesuarit kanë shfaqur shenja frike.

Nga grupi i punës mësohet se fillimisht me ta po punohet për ambientimin e tyre në territorin shqiptar.

Nuk ka një afat të caktuar se sa 5 shqiptarët do të qëndrojnë në Kavalishencë në Durrës, ndërsa takimet me familjarët nuk do u ndalohen.

Po ashtu, pjesë e grupit të punës do të jetë edhe njësia e Antiterrorit. Edhe pse nuk do të kenë agjentë pranë godinës ku janë strehuar 4 fëmijët dhe Floresha Rasha, sërish ata do të vëzhgohen në distancë. Kjo për shkak të dyshimeve se mund të kenë lidhje me persona që mund t’i nxisin për qëllime terroriste.